11, 12, 13 сентябрь көннәрендә безнең театр сәхнәсендә татар драматургиясе классигы Нәкый Исәнбәтнең пьесасы буенча куелган «Хуҗа Насретдин» спектакленең премьерасы булды. Әлеге куелыш татар театрының 120 еллыгына багышлана. Көнчыгыш фольклорының иң мәшһүр герое белән очрашырга теләгән төрле яшьтәге тамашачылар бик канәгать калдылар. Сәхнәдән үткен шаярулар яңгырады, музыка агылды, сарай интригалары үрелде һәм чын могҗизалар күрсәтелде.   Премьера көннәре узды, ләкин спектакльнең тормышы башланып кына килә! Афишаны күзәтеп барыгыз: «Хуҗа Насретдин» тамашачыларны яңа 37 нче театр сезонында сөендерүен дәвам итәчәк.